Euskara
Logo-bortzirietako euskara mankomunitatea

Helburuak eta antolaketa

ANTOLAKETA

Bortzirietako Euskara Mankomunitatea herri erakundea da, eta Bortzirietako bortz udalerriek, hots, Arantza, Bera, Etxalar, Igantzi eta Lesakak osatzen dute.

Batzorde Erabakitzailea
Mankomunitateko erabaki organu gorena da. Berak eta Lesakak bina ordezkari dituzte batzorde horretan, eta, Arantzak, Etxalarrek eta Igantzik bana. Hilean behin biltzen da, eta bertan adosten dira urteroko plangintza, aurrekontuak eta mankomunitateak bere helburuak erdiesteko hartu beharreko erabaki guztiak.
Horiez gain, Bortzirietako euskalgintzako bi kidek hartzen dute parte bertan. Ez dute boto eskubidea, baina bai hitza hartzekoa eta eztabaidetan euren iritzia plazaratzekoa.

Lehendakaritza

Estatutuek jasotzen duten gisara, Arantzako alkatea edo udal horrek aukeratutako ordezkaria da beti Bortzirietako Euskara Mankomunitateko Lehendakaria. Arantza Udalerri Euskaldunen Mankomunitateko (UEMA) partaide da erakunde hori sortu zenetik.

Aholkularitza Batzordea

Hilean behin biltzen da. Bertan parte hartzen dute Bera eta Lesakako euskara batzordeetako bina ordezkarik, eta Arantza, Etxalar eta Igantziko euskara batzordeetako ordezkari banak. Herritarron hizkuntza eskubideei begiratzen die, eta euskararen normalkutza bidean egin beharreko urratsen inguruan proposamenak egiten ditu.

Eskualdeko euskalgintzaren ordezkari dugu Aholkularitza Batzordea, eta mankomunitatearen urteroko plangintza eta aurrekontuak onartzeko bere aldeko txostena beharrezkoa da.

Herrietako Euskara Batzordeak

Hilean behin biltzen dira, gutxienez. Bertan parte hartzen dute euskararen normalkuntzan eragile diren erakundeen ordezkariek, udal hautetsiek, eta herritar euskaltzaleek. Herritarron hizkuntza eskubideei begiratzen diete, eta euskararen normalkuntza sustatzeko hainbat jarduera eta ekintza egiten dituzte.

Batzorde hauen izaera irekia da, eta euskararen alde bere ekarpena egiteko borondatea duen edozein herritarrek hartzen ahal du parte. Bertzetik, euskalgintzak herri erakundeari bere eskakizunak zuzenean egiteko gune ere badira.

Halaber, euskararen normalkuntzan lanean diharduten eragile eta herritarren bilgune izatea dute helburu.

Lan Munduko Batzordea

Hilean behin biltzen da. Batzorde berriena da, eta bertan biltzen dira Bortzirietako lantegietako langileen ordezkariak, Bortzirietako Euskaltegiko ordezkaria eta euskara teknikaria. Lan Munduan euskararen presentzia eta erabilera azkartzeko neurriak aztertzen dira bertan. Sentsibilizazio kanpainak bideratzen dira bertatik, baita lantegietan euskararen erabilera areagotu zein normalizatzeko planak abian jar daitezen baldintzak lantzen ere.