Urte hasieran argitaratu zuen mankomunitateak, eta herriz herri emanaldiak eskaini, Gogoa pauso, pausoa bide dokumentala, Bortzirietan 1970-1990 bitartean euskara biziberritzeko prozesua nolakoa izan zen kontatzen duena. Ikus-entzunezkoak bi hamarkada horietan hizkuntza biziberritzeko egitasmo ezberdinetan, hala nola, euskal kultura suspertzen, ikastolak sortzen, eskola publikoetan D eredua sustatzen, bertsolaritza berpizten, helduentzako gau eskolak eta euskaltegiak sortzen, euskarazko tokiko komunikabideak abian jartzen… aritutako 20 eragile eta ekintzaile hauen lekukotzak ditu oinarri:
| Amaia Abuin (Lesaka) | J. Emilio Txoperena Txoltxan (Lesaka) |
| Antton Erkizia (Lesaka) | Juana Larralde (Arantza) |
| Bittori Telletxea (Bera) | Kontxexi Arangoa (Etxalar) |
| Bixente Taberna (Bera) | Kontxi Erro (Lesaka) |
| Eduardo Conde (Lesaka) | Manolo Arotzena (Lesaka) |
| Itxaro Aranibar (Bera) | Mikel Legarra (Goldaratz) |
| Ixa Ordoñez (Bera) | Oskar Txoperena (Igantzi) |
| Joxe Mari Iratzoki (Bera) | Patxi Iñigo (Bera) |
| Joxema Irigoien (Etxalar) | Patxi Larretxea (Arantza) |
| Joxepa Etxeberria (Igantzi) | Pepi Olaetxea (Bera) |
Hemendik aitzinera dokumentala bera eta 20 elkarrizketak egonen dira ikusgai mankomunitatearen webgunean.
Bortzirietako Euskara Mankomunitatea izan da dokumental honen sustatzailea eta Katubi Ikus-entzunezkoak egilea. Pasarteen aukeraketan eta gidoia lantzen Leire Errandonea, Iban Garro, Oier Fuentes eta Patri Arburua aritu dira. Egitasmoak Nafarroako Gobernuaren dirulaguntza jaso du.