Euskarazko Produktuen Katalogoaren aurtengo edizioa prest dago, haur eta gazteentzako ehunka produktu berrirekin. Azaroko azken astean jaso dute Bortzirietako 1.000 familiek postaz edo eskolaren bidez. KATALOGOA.EUS web orriak, aldiz, 8.250 produkturen erreferentziak jasotzen ditu dagoeneko.
Urteko garai hau seme-alabei edo ingurukoei euskarazko liburuak, musika edota jostailu eta jokoak erosi eta oparitzeko aukera paregabea izaten dela kontuan hartuz, Euskarazko Produktuen Katalogoaren 27. edizio hau osatu dute, bertze urte batez, Euskal Herriko udal eta mankomunitatetako 92 Euskara Zerbitzuk. Tartean da Bortzirietako Euskara Mankomunitatea.
Bai etengabe eguneratzen den web orriak zein paperezko edizioak, biek ere itxura berriak estreinatu dituzte, eta jasota dituzten produktuak bi ataletan dituzte sailkatuak: atal bat 0-12 urte bitarteko haurrentzako produktuekin osatua dago, eta bertzea 12-16 urte bitarteko gazteentzako produktuekin.
Paperezko edizioak 56.000 ale
Egunotan banatuko dira paperezko edizioaren 56.000 aleak Araba, Bizkaia, Gipuzkoa eta Nafarroan, baita Bortzirietan ere. Azkeneko urteotan egin den modu berean, aurten ere paperean editatzen den katalogoak bi azal izanen ditu: azal batek sarbidea ematen die 12-16 urte bitarteko gazteentzat eskaintzen diren produktuei, eta bertze aldeko azalak 0-12 urte bitarteko haurrentzako produktuei eta gurasoentzako materialei. Aurkezpen honi esker produktuen bilaketa nabarmen errazteaz gain, nortasun propioa ematen zaio adin tarte bakoitzari. Jakina, paperezko edizioak ez ditu erakusten KATALOGOA.EUS web orrian jasota dauden produktu berri guzi-guziak, atalka antolatutako hautaketa bat baizik: musika, filmak, aldizkariak, komikiak, liburuak, jostailu eta jokoak eta gurasoentzako materiala.
Maiz eguneratzen den web orriak milaka produktu ditu eta, bat erosi nahi izanez gero, produktuan klik eginez argitaletxeen denda birtualetara sartzeko aukera ematen du
KATALOGOA.EUS maiztasunez eguneratzen den web orria da, argitaratzen diren produktu berriak sartuz, deskatalogatu direnak kenduz eta, hartara, KATALOGOA.EUS bizi-bizirik dago. Orain 8.250 produktu inguru biltzen ditu bi atal nagusien artean. Paperezko edizioak bezala, KATALOGOA.EUS web orriak ere bi atal nagusi ditu: 0-12 urte bitarteko haurrentzako produktuekin osatua bata, eta 12-16 urte bitarteko gazteentzako produktuekin osatua bertzea. Eta ez hori bakarrik, atal bakoitzak bere direktorioa du eta, horrela, tipologia bakoitzeko produktuen bilaketa nabarmen erraztu eta hobetzen da produktuak tituluaren, argitaletxearen, autorearen, adin tartearen edota prezioaren arabera bistaratu daitezkeelakoz. Azkenean, erabiltzaileak produkturen bat begiz joz gero, argitaletxearen denda birtualera sartzeko manera izanen du ‘non eskuratu’ botoian klikatuta.
Buletin elektronikora harpidetuta, nobedadeen segimendua egin daiteke urte osoan
Urtean zehar azken nobedadeen berri izan nahi dutenei, KATALOGOA.EUS web orriak buletin elektronikora harpidetzeko bidea ere ematen die. Hartara, harpidedunek urtearen buruan hamar buletin jasoko dituzte, argitaratu berri diren produktuen erreferentziekin. Izan ere, horixe baita KATALOGOA.EUSen helburua: merkatuan aurki daitezkeen euskarazko azken nobedadeak ere erabiltzaileen eskura modu erraz batean jartzea.