Bortzirietako Euskara Mankomunitatea 2026-2031 bitartean garatuko duen plana osatzen ari da aurten, eta horretarako parte hartze prozesua egiten ari da herritar eta eragileekin. Prozesu horren lehen fasea apirilean akabatu zen, eta bertan jasotako ideia, proposamen eta helburuak kontuan hartuta, planaren zirriborroa prestatu du mankomunitateak.
Hurrengo urratsa oinarrizko dokumentu hori aurkeztea eta osatzea izanen da, batik bat proposatu diren ekintzak zein eragilek eramanen dituen aitzinera erabakitzea. Horretarako mankomunitateak herritar eta eragileekin bertze saio bat eginen du heldu den irailaren 13an, larunbatarekin, Igantziko Baratzondo elkartean, 10:00-14:00 bitarte, tartean kafetxorako tartea hartuta.
Saioa irekia izanen da Bortzirietako herritar eta eragile guzientzat, prozesuaren lehen zatian parte hartu dutenentzat nahiz interesa izaten ahal duten gainerako guzientzat. Horretarako beharrezkoa da aitzinetik izen ematea, irailaren 10a baino lehen, formulario hau betez: https://bortziriak.eus/ninja-forms/8raei
Saio horretan egindako ekarpenak bildu ondotik, mankomunitateko Batzorde Erabakitzaileak plana aztertuko du eta ontzat eman. Ondoren, 2026ko ekintza plana eta aurrekontua prestatuko dituzte.