Euskara ikasleek 2025-2026 ikasturteko dirulaguntzaren lehenbiziko zatia hartu dute. Dirulaguntza eskaera egiteko epea urriaren 10era artekoa zen, eta aurkeztu diren eskaerak aztertu ondotik ebazpena egin du mankomunitateko lehendakariak azaroaren 4ko datarekin.
Euskara mankomunitateak 2025eko apirilean euskara ikasleei dirulaguntzak emateko deialdia onartu zuen, 2025eko uztailaren 1etik 2026ko ekainaren 30era arte egindako ikastaroen matrikula gastuak bere barne hartzen dituena. Udako ikastaroak egin zituzten edota 2025-2026 ikasturteko dirulaguntza aitzinatzea nahi zuten ikasleek 2025eko irailaren 1etik urriaren 10era arteko epea zuten eskaerak egiteko. Behin eskaerak aztertuta, dirulaguntza jasotzeko baldintzak 51 ikaslek betetzen zituztela ebatzi da. Hala, euskara mankomunitateak 13.949,00 € banatu ditu euskara ikasteko.
Eskatzaileen ikastegiari erreparatzen badiogu, gehienak Bortzirietako euskaltegiko ikasleak dira (49), eta bi ikaslek udako barnetegietan ikastaroa egiteagatik jaso dute dirulaguntza, Maizpide Euskaltegian hain zuzen ere.
Euskara mankomunitateak doakotasuna du helburu, herritar guztiek euskara ikasteko eskubidea bermatua izatea alegia, eta horretarako matrikularen % 100eko dirulaguntza ematen du. 2025-2026 ikasturtea hasi dutenen kasuan, dirulaguntzaren % 75 hartuko dute orain, eta falta den % 25 ikasturte bukaeran.