Zirhika elkarteak, Badihardugu elkartearekin eta UEUrekin elkarlanean Euskal Herriko II. Hika Topaketa antolatu zuen Markina-Xemeinen joan den azaroaren 7an, bi urtean behin egiten dena, eta hurrengo topaketaren lekukoa bortziritarren esku uztea erabaki zuen: 2027ko Euskal Herriko Hika topaketa Lesakan izanen da. Markina-Xemeinera bertaratu ziren Bortzirietatik lekukoa hartzera Leire Mitxelena, Bortzirietako Euskara Mankomunitateko lehendakaria, eta Uxue Royo, Lesakako udaleko eta euskara mankomunitateko ordezkaria.
2027a urrun ikusten badugu ere, gogo onez eta grinatsu helduko diote mankomunitateak eta Lesakako Udalak erronkari, eta hasiko dira Hika topaketaren antolaketari begira urratsak egiten. Mankomunitateak onartu berri du euskara biziberritzeko III. Plan Estrategikoa 2026-2031, eta hitanoaren biziberritzeari dagokionez, honako ekintza hauek aurreikusten dira Hika Topaketaren antolaketaz gain (bereziki 2027an gauzatzeko): hitanoaren inguruko formakuntza, hitanoaren erabilera sustatzeko jarduerak eta ekimenak antolatzea, eta Pello Apezetxea Zubiri ikerketa bekaren baitan hitanoaren biziberritzea berariazko ikerketa ildo gisa proposatzea.
Heldu den urte akabailan 2027an Lesakako Hika Topaketa antolatzeko taldea sortuko da eta bertan parte hartzeko gonbidapena zabalduko diete herritar eta eragileei.