Aurtengo ekainaren 26an iragarri zen 2024ko Etxepare sariaren irabazleak Maite Rosende eta Nerea Ariznabarreta izan zirela, Mamuki lanarekin. Hura izan zen lehiaketan parte hartu zuten 31 lanen artetik osoena, epaimahaiak hala ebatzita. Orain Pamiela argitaletxeak albuma argitaratu du eta horren aurkezpena egin zen urriaren 9an, Iruñeko Karrikiri Elkartean.
Etxepare saria Nafarroako 23 toki entitatek, haien euskara zerbitzuen bidez, antolatzen dute. Tartean da Bortzirietako Euskara Mankomunitatea. Pamiela argitaletxeak eta Gatzagorri Elkarteak egitasmo honi laguntza eskaintzen diote, eta Nafarroako Gobernuaren babes ekonomikoa ere badu.
Mamuki albuma eta egileak
Maite Rosende ilustratzaile donostiarrak eta Nerea Ariznabarreta idazle eibartarrak elkarlanean egindako lana da, «beldurrari buruzko gogoeta jostagarria», epaimahaiaren erranetan. Mamu txiki bat da istorio honen protagonista, Mamuki. Gau Beltza da eta gaixorik dagoenez ezin du ikaririk eman. Horregatik, hainbat pertsonaia beldurgarri saiatuko dira hura osatzen edo sendatzen, hala nola banpiroa, zonbia, Zakuzahar edo Otsoko, baina ez dute sendatzea lortuko. Edo bai?
