Aurten, urtero bezala, Bortzirietako zenbait establezimenduk bisita jaso zuen; euskara mankomunitateak kontratatuta, AHIZE aholkularitzako teknikariak Herrian erosi, euskaraz erosi (HEEE) egitasmoaren eskaintzaren inguruko informazioa eman zien bertatik bertara establezimenduetako arduradunei.
Baztan-Bidasoko merkataritzan, ostalaritzan eta zerbitzuetan euskararen erabilera handitzeko sortu zen HEEE, eskualderako irudi propioa duena. Alde batetik, merkatariei zenbait euskarri eta zerbitzu eskaintzen zaizkie (itzulpen zerbitzua barne), eta, bertzetik, herritarrei deia egiten zaie herrian eta euskaraz egin ditzaten erosketak. Komertzio berriak ari diren irekitzen eskualdean eta datozen urteotan arlo honetan eragiten segitzea da mankomunitatearen asmoa. Euskal Herri mailako Euskaraz barra-barra egitasmoaren osagarri da Herrian erosi, euskaraz erosi. Oraingoz, beharrezkoa izanen da tokian tokiko markei eustea, Euskaraz barra-barrak ez baitu hainbat material, zerbitzu eta baliabide eskaintzen. Bere egitekoa da, batez ere, establezimenduetan euskara zerbitzu hizkuntza izanen dela bermatzea eta horretarako ematen du zigilua. Herrian erosi, euskaraz erosi egitasmoak, itzulpen zerbitzua eskaintzeaz gain (UEMAren bidez), euskaraz ez dakiten establezimenduetan ere eragiten du, hizkuntza paisaian, euskara ikasteko oinarrizko ikastaroak eskainiz, etab.
Aseguru etxe eta aholkularitzak
Urtero sektore edo eragite arlo bat aukeratzen da, eta aurten batez ere aseguru etxe eta aholkularitzen txanda izan da, bisitatu diren establezimendu gehienak arlo horretakoak izan dira. Orotara, 8 establezimendu bisitatu dira Beran eta 7 Lesakan.
Bera
- Allianz Aseguruak.
- Baztango Inmobiliaria.
- Iriarte-Etxandi Aholkularitza.
- Mafre Aseguruak.
- Mutua Navarra Aseguruak.
- Semper Autoeskola.
- Ugaldea Aholkularitza.
- Zergalan Aholkularitza.
Lesaka
- Asegi Aholkularitza.
- Lesaka Autoeskola.
- Lesakako Notariotza.
- Mafre Aseguruak.
- Mutuavenir Aseguruak.
- Onin Agentzia.
- Orbela Aseguruak.
Hona hemen zerbitzuei banatu zaien materiala, bakoitzak behar eta nahien arabera aukeratu dituenak. Aurten bereziki Euskaraldia landu da eta bisita hauen ondotik honako establezimendu hauek eman dute izena: Beran Iriarte-Etxandik eta Zergalanek, eta Lesakan Orbelak eta Autoeskolak.
Horrez gain, hizkuntza paisaia eta ingurune digitala euskaratzeko mankomunitatearen dirulaguntza deialdiaren berri eman zaie establezimenduei eta interes berezia agertu dute. Eskaerak egiteko epea zabalik izanen urriaren 31 arte.
Datuak
2019tik egitasmoa abiatu eta bisitak egiten hasi zenetik, 6 sustapen aldi izan dira eta guztira 78 establezimendu bisitatu dira. Urtero arlo jakin bat aukeratu da, nahiz eta izan den behin baino gehiagotan landu denik.
- 2019an: Janari denda, fruta denda, harategi eta arrandegiak.
- 2020an: Dendak, harategi, arrandegi eta fruta dendak.
- 2021: Ostatu eta jatetxeak.
- 2022an: Bentak, okindegi, gozotegi eta kafetegiak.
- 2023an: Herri txikiak, bentak, burdindegiak, etxetresnak eta altzari dendak.
- 2024an: Bera eta Lesakako ostatu eta jatetxeak, estankoak eta Berako zenbait denda.
- 2025: Aseguru etxeak, aholkularitzak, autoeskolak eta notariotza.
Urteroko sustapenetan ez dira arlo bakoitzeko establezimendu guztiak bisitatu, behar eta lehentasunen araberako aukeraketa bat egin da. Zeregin horretan euskara mankomunitateak hautetsi eta herritar euskaltzaleen laguntza izan du.
Etorkizunera begira
Euskara mankomunitatea 2026-2031 urte bitarteko plan estrategikoa ari da lantzen. Arlo sozioekonomikoan eta merkataritzan eragitea lehentasunezkoa izanen da aurrerantzean ere. Eragite lan hori emankorragoa izan dadin, Baztan eta Malerrekako euskara zerbitzuekin elkarlanean sakontzea izanen da gakoetako bat. Halaber, asmoa da arloz arlo eragiten jarraitzea eta establezimenduekin zuzeneko harreman hori estutzea. Merkatarien eta zerbitzuen elkarteekin elkarlana berreskuratzea da bertze helburuetako bat, izan ere, pandemiaz geroztik ez baita apenas harremanik izan. Datozen urteotan egitasmoari ikusgarritasun handiagoa eman nahi zaio eta establezimenduentzako erabilgarria izanen den material berria sortu. Aurrez aurreko bisitei eutsiko zaie, hori baita biderik eraginkorrena merkatariengana heltzeko.